Bugungi kunda dunyo miqiyosida oziq-ovqatga bo‘lgan ehtiyojning ortib borishi, ichki suv havzalari biologik potensialidan, jumladan, baliq resurslaridan oqilona foydalanishni taqozo etmoqda

Kirish
Bugungi kunda dunyo miqiyosida oziq-ovqatga bo‘lgan ehtiyojning ortib borishi, ichki suv havzalari biologik potensialidan, jumladan, baliq resurslaridan oqilona foydalanishni taqozo etmoqda. Shunga ko‘ra, respublikamizdagi mavjud tabiiy va sun’iy suv havzalaridan foydalanishda baliqchilikni rivojlantirish hamda baliq mahsuldorligini oshirish chora-tadbirlarini ishlab chiqish dolzarb ilmiy-amaliy ahamiyat kasb etadi. Baliq xo‘jaligi sektorida intensiv usullarni rivojlantirishga, jumladan, tabiiy va sun’iy suv havzalarida yaylov akvakulturasi samaradorligini oshirish va istiqbolli baliq turlarini joriy etishga katta e’tibor qaratilmoqda. Bu borada masalan turli tabiiy-geografik hududlarda joylashgan suv omborlarida baliq turlarini yetishtirish usullari ishlab chiqildi, yaylov baliqchiligida ovlanadigan baliq populyasiyasi holatini monitoring qilish va ovlashni samarali tashkil qilish choralari takomillashtirildi.
Ko‘plab Markaziy Osiyo davlatlari singari respublikamiz ochiq dengiz bilan tutashmagan bo‘lib, bu holat mintaqada baliqchilik tarmog‘ini rivojlantirish uchun ma’lum darajada to‘siq bo‘lishi mumkin. Ana shundan kelib chiqib baliqchilikni rivojlantirish uchun mavjud tabiiy va sun’iy suv havzalari hamda hovuz xo‘jaliklaridan unumli va ratsional foydalanishni yo‘lga qo‘yish davr taqozosi bo‘lib turibdi.
Mavzuning dolzarbligi: Hozirda respublikamizda baliqchilik tarmog‘ini rivojlantirish, baliq zahiralaridan samarali foydalanish, innovatsion akvakulturani rivojlantirish va suvdan kompleks foydalanishga alohida e’tibor qaratilmoqda. Xususan mahalliy iqlim sharoitlarini hisobga olgan holda baliq turlarini ko‘paytirish va ularni yetishtirish hajmlarini oshirishning intensiv usullari amaliyotga joriy etilmoqda. Ta’kidlash joizki, har qanday suv havzasi ixtiofaunasi bioxilma-xilligini o‘rganishda sanoat ahamiyatiga ega va sanoat ahamiyatiga ega bo‘lmagan ya’ni hashaki baliqlarning o‘zaro nisbatini bilish, ularning o‘zaro munosabatini va muvozanatini aniqlash muhim ahamiyat kasb etadi. Mavzuning dolzarbligidan kelib chiqib “Biologiya” kafedrasi ushbu tadqiqot ishini menga topshirdi.