Ёш оилаларни қўллаб қувватлашнинг ижтимоий психологик усуллари

Битирув малакавий ишнинг методологик асоси бўлиб, аввало “Оила Кодекси”, “Ёш оилаларни моддий ва маънавий қўллаб-қувватлашга доир қўшимча чора тадбирлар тўғрисида”ги Фармонлари, «Соғлом авлод», “Ёшлар йили”, “Баркамол авлод йили” давлат дастурлари ҳамда Президентимиз И.А Каримовнинг маънавий ва ижтимоий ҳаётни эркинлаштириш, маънавий-маърифий ислоҳотларни чуқурлаштириш билан боғлиқ фикр ва ғоялари ташкил қилади.
Республикамизда оила ва никоҳ масалаларига эътиборнинг катталигини ҳисобга олиб, кўпчилик тадқиқотчилар ўз илмий изланишларини ана шу муаммоларга бағишлаганлар. Ўзбекистон психологларининг ўзбек оиласини тадқиқ этиш бўйича ишлаб чиққан назарий ёндашувлари (М.Мирҳосилов, Ғ.Б.Шоумаров, В.М.Каримова, Э.Н.Сатторов, Н.А.Соғинов, Ф.Акрамова, Э.Ш.Усмонов, Х.Каримов, Н.Лутфуллаева, Ё.Нўъмонова ва бошқалар) ҳам хизмат қилди.
Битирув малакавий ишнинг мақсад ва вазифалари.
Ёш оилаларнинг оилавий ҳаётларини барқарорлаштиришда ёш келин-куёвларнинг оилавий ҳаётга биологик, ижтимоий, психологик, иқтисодий, ҳуқуқий, маънавий, аълоқий жиҳатдан етукликлари, шахслараро муносабатлар психологиясининг ўзига хос сир-асрорларини ўрганганликлари, эмоционал ҳиссий муносабатларнинг хусусиятларини билишлари муҳим аҳамиятга эга. Чунки, оиланинг мустаҳкамлиги кўп жиҳатдан оила қураётган ёшларнинг оилавий ҳаётга қай даражада тайёр эканлигига боғлиқ. Шунинг учун оилавий ҳаёт заминида юзага келадиган нохуш ҳодисаларнинг олдини олиш, оилалар бузилишининг олдини олиш ва нотўлиқ оилалар миқдорини камайтириш, уларда ҳар томонлама соғлом психологик иқлимни юзага келтириш борасида амалга ошириладиган ишларнинг самарадорлиги шу оилаларни юзага келтираётган ёшларнинг шахсига, индивидуал психологик хусусиятларига, уларнинг оилавий ҳаётларини мақсадга мувофиқ равишда ташкил этишга қай даражада тайёр эканликларига боғлиқдир. Шу маънода юртимиздаги оилалар эндигина ҳаётга қадам қўйиб келаётган ёшларнинг онгига шундай фикрни сингдириш керакки, улар ўртага қўйилган мақсадларга эришиш ўзларига боғлиқ эканлигини, яъни бу нарса уларнинг собитқадам ғайрат-шижоатига, тўла-тўкис фидокорлигига ва чексиз меҳнатсеварлигига боғлиқ эканлигини англаб етишлари керак.
Жамият тараққиётининг ҳозирги ҳолати оила олдига ўзига хос янги ижтимоий вазифаларни қўймоқда. Фан-техника тараққиёти, ишлаб-чиқариш муносабатлари, одамларнинг ўзаро мулоқот, муносабатлари доираси инсон руҳиятида ҳиссий эмоционал ўзгаришларни вужудга келтирмоқда ва булар оилавий ҳаёт характерига ҳам ўз таъсирини ўтказмоқда.
Шулардан келиб чиқиб ёш оилаларнинг мустаҳкамлигига ва йигит-қизларнинг ҳаётда ўз ўрнини топишларига илмий-амалий, психологик ёрдам бериш масаласи тадқиқотнинг асосий мақсади бўлиб хизмат қилади.
Тадқиқот мақсадини амалга ошириш учун уйидаги вазифалар белгиланди:

1. 
   Ёш оилалар ҳақида психолог олимларнинг фикрларини тахлил қилиш.
   
2. 
   Ёш оилаларда шахслараро муносабатнинг ўзига хослигини тахлил қилиш.
   
3. 
   Ёш келин-куёвларнинг оилавий ҳаётга етуклиги ва уларнинг оилавий ҳаёт ҳақидаги фикрларини ўрганиш.
   
4. 
   Олинган натижаларни тахлил қилиш, умумлаштириш ва хулосалар чиқариш.