Ёш оилаларни қўллаб қувватлашнинг ижтимоий психологик усуллари

Битирув малакавий ишнинг илмий фарази. Бизнинг тахминимизча, ёш оилаларда илиқ психологик муҳитнинг шаклланишида келин-куёвларнинг ушбу жараёнга фаол ижтимоий-психологик тайёргарликлари етакчи рол ўйнаши мумкин. Бундай ижтимоий-психологик тайёргарликлар асосида ёш оиланинг барқарорлиги мустаҳкамланиши эҳтимол.
Битирув малакавий ишнинг методлари.
1. Ёш оилаларнинг оилавий муносабатлар жараёнини ўрганиш мақсадида кузатиш ва суҳбатлар ўтказиш.
2. Ёшларнинг оилавий ҳаёт ҳақидаги фикрларини ўрганиш учун анкета сўровидан фойдаланиш.
3. Ёш оилавий муҳитнинг мазмунини ўрганиш учун «Оилавий ҳаётга тайёрмисиз?» тестини ўтказиш.
4. Оилавий ҳаёт мазмунини бойитиш мақсадида ижтимоий тренингларни татбиқ этиш.
5.Олинган натижаларни математик, статистик қайта ишлаш.
Битирув малакавий ишнинг объекти. Ёш оилаларнинг оилавий турмуш тарзини аниқлаш учун Фарғона давлат университети гуманитар факультетининг 4-курс оилали талабаларидан 50 нафар йигит-қизлар танланди.
Битирув малакавий ишнинг предмети бўлиб, ёш оилаларни қўллаб-қувватлашнинг ижтимоий психологик омиллари ҳамда ижтимоий тренингларда намоён бўлган шахс сифатларини таркиб топтириш жараёни ҳисобланади.
Маълумки, ижтимоий хулқнинг мақсадга мувофиқ барқарор малакаларини шакллантириш учун кўп марта такрорланишга асосланувчи қайтариладиган машқлардан ташқари, шахс томонидан уларни англаш ва руҳан ичдан қабул қилиш ҳам катта аҳамиятга эга.
Ёшлар руҳиятида эмоционаллик ва ҳиссиётнинг устунлигини эътиборга олсак, айнан тренинг машқлари уларнинг оилавий муносабатлар бўйича билимлар доирасини кенгайтириш, уларда мустаҳкам, мақсадга мувофиқ малакаларни ҳамда хулқ шаклларини ижтимоий установкалар сифатида ҳосил қилиш вазифасини бажаради.
Битирув малакавий ишнинг янгилиги. Тадқиқотнинг илмий жиҳатдан янгилиги ҳамда қиймати қуйидагилар билан изоҳланади:

1. 
   Тадқиқотда ёш оилаларнинг оилавий ҳаёт тарзи илмий-назарий жиҳатдан асосланганлиги.
   
2. 
   Ёш оилаларни қўллаб-қувватлаш мақсадида йигит ва қизларни оилавий муносабатларнинг ўзига хос қонуниятлари ҳақидаги билимлар билан таништирилганлиги.
   
3. 
   Оилали талаба ёшларда оиланинг мустаҳкамлигини таъминловчи билим ва малакаларни шакллантирилганлиги.
   
4. 
   Ёш оилаларда оилавий муносабатларни барқарорлаштириш мақсадида ижтимоий тренинглар воситасидан амалда фойдаланилганлиги.