G‘o‘za kasalliklari va ularga qarshi kurash choralari Reja

Tuproq sho‘rligiga g‘o‘za nihollar fazasida juda chidamsiz (ayniqsa tuproqda natriy moddasining kalsiyga nisbatan baland miqdori mavjudligida). SHo‘r tuproq chigit unishi va o‘sishiga to‘sqinlik qiladi, nihol kasalliklari kuchayishiga, ekin siyrak bo‘lib, dalada bo‘sh qolgan joylar paydo bo‘lishiga olib keladi. O‘simliklar rivojlanishi kechikadi, namlik yetarli bo‘lsada suvni o‘zlashtirishi kamayadi, bo‘yi past bo‘lib qoladi va vaqtidan oldin pishib yetiladi, ammo hosil kam to‘planadi.

Tuproq nordonligi odatda qumloq va ohaksiz tuproqlarda uchraydi. Tuproqda alyuminiy va marganets moddalarining baland miqdorlari kuzatiladi, ular ildiz o‘sishini sekinlashtiradi yoki to‘xtatadi, o‘simlik bo‘yi pasayadi, hosil kamayadi.

Tuproq namligi. Dalada suv 48 soat yoki ko‘proq turib qolishi, tuproqda kislorod miqdorini kamaytiradi, o‘simlik nafas olishi, oziqa moddalari va suvni o‘zlashtirishiga to‘sqinlik qiladi, nihol kasalliklarini kuchaytiradi. O‘simlik bo‘yi pasayadi, barglari sarg‘ayadi va qizg‘ish tus oladi, ba’zan suvi qurib qoladi.

O‘g‘it tuproqda chigitga yaqin joylashsa, chigit chiriydi, nihollar siyrak bo‘lib qoladi, ildizlari chiriydi va o‘simlik nobud bo‘lishi mumkin. Azot yoki ammiak eritmalari bilan qo‘shimcha oziqlantirish yosh nihollarni kuydirishi va quritishi mumkin. Azotli o‘g‘itlarning baland miqdorlari ta’sirida oziqlantiruvchi yon ildizlar chirishi va parazit organizmlar bilan zararlanishi kuzatiladi.

Garmsel. Issiq shamol, ayniqsa qum bilan birga esishi, o‘simlik barglari qurishiga, yosh ko‘saklar to‘kilishiga va hosil pasayishiga olib keladi.