Iqtisodiyot va servis

Kurs ishining asosiy qismida mavuning mohiyatini aks ettiruvchi nazariy fikrlar, tahlillar va ushbu mavzu bo‘yicha muammolarni bartaraf etish hamda shu sohani rivojlantirish yuzasidan amalga oshirilayotgan chora-tadbirlar yoritib berilishi kerak. Talabadan kurs ishi orqali fanda yangilik yoki yangi ilmiy qoida yaratish talab qilinmaydi. Talaba savollarni yoritish jarayonida ilmiy adabiyotlardan tushunib, foydalanganini, to‘g‘ri umumlashtirib, xulosa chiqara bilishi, nazariy qoidalarni tajriba, amaliyot bilan bog‘lay olishini namoyish qilishi kerak.
Ana shu jarayonda talabaning ishida ilmiy izlanish unsurlari yuzasidan mustaqil iqtisodiy fikrlay olish qobiliyati namoyon bo‘ladi.
Foydalanilgan adabiyotlar ro‘yxatida kurs ishi yozishda talaba tomonidan o‘rganilgan barcha adabiyotlar, jurnal, gazetada berilgan maqolalar, monografiya, statistik to‘plam va boshqalar to‘la ravishda muallifining ismi-sharifi, asar yoki maqola va boshqalarning nomi, nashriyot nomi, nashr qilingan yili ko‘rsatilgan bo‘lishi kerak. SHuningdek, foydalanilgan adabiyotlar va statistik ma’lumotlarning yangiligi e’tiborga olinishi zarur. Kurs ishi rejasi tuzilgandan so‘ng uni bajarish muddatini aniq belgilash kerak.
Kurs ishining oxirida tahlil qilingan mavzuga oid bo‘lgan muammolarni kelajakda hal etish yo‘l-yo‘riqlari va uni rivojlantirish imkoniyatlari berilishi zarur. Har bir kurs ishi ana shunday talablarga javob berishi talab qilinadi.
Adabiyot tanlash, uni o‘rganish, qayta ishlash va kurs ishi matnining xomaki hamda oxirgi variantlarini tayyorlash uchun sarf qilinadigan vaqt miqdori va bajarish muddatini aniq belgilab olishlari, maqsadga muvofiqdir. Belgilangan muddatga qarab ishni bajarishda shoshma-shosharlikka yo‘l qo‘yilmaydi, balki talabaning pishiq-puxta ish olib borishi ta’minlanadi va unga kurs ishini o‘z vaqtida nihoyasiga etkazib, topshirish imkonini beradi.
Kurs ishini bajarishda talaba mazkur ko‘rsatmada keltirilgan adabiyotlar bilan cheklanmasdan, ayrim masalalarni batafsil bayon qilish imkonini beradigan qo‘shimcha adabiyotlardan ham faydalansa, maqsadga muvofiq bo‘ladi. Talaba kurs ishi uchun qo‘shimcha adabiyotlarni universitetimiz kutubxonasidan va boshqa kutubxonalardan olishi mumkin.
Adabiyotlar va ma’lumotlardan foydalanishda quyidagilarga e’tibor qaratish lozim:

• 
  talaba o‘rganib chiqayotgan va tanlagan mavzuga taalluqli adabiyotlarni to‘liq yozmasdan, o‘z so‘zi bilan qisqacha va ijodiy bayon qilib berishi;
  
• 
  zarur hollarda foydalanilayotgan jumlalarni o‘zgartirmay, aynan ko‘chirishi;
  
• 
  umumiy daftar tutib, rejadagi har bir savolga taalluqli fikrlarni alohida yozib qo‘yishi va kerak bo‘lganda, ulardan foydalanishi;
  
• 
  mavzuga taalluqli fikrlarni ayrim varaqlarga va maxsus kartochkalarga yozib qo‘yishi. Kartochka tizimi afzalligi shundaki, u kerak bo‘lgan fikrlarni tezroq qidirib topish imkonini beradi;
  
• 
  uchragan hamma ma’lumotlar va raqamlarni ko‘chirib olmasdan, ko‘rib chiqilayotgan mavzuga bevosita tegishli eng muhim ma’lumot va raqamlardan foydalanishi;
  
• 
  O‘zbekiston o‘z mustaqilligiga ega bo‘lgan davridan boshlab, qanday yutuqlarga erishganini aniq ma’lumotlar asosida ko‘rsatishi;
  
• 
  ma’lumotlarga asoslanib tuzilgan jadval, grafik va diagrammalar hamda nazariy jihatdan tahlil etilayotgan fikrlarning amaliyotda naqadar ahamiyatga ega ekanligini ko‘rsatib berishi.
  

Talaba barcha adabiyotlarni batafsil o‘rganib, ularni konspekt qilgandan keyin kurs ishini yozishga kirishishi mumkin.
Ishda yo‘l qo‘yilgan xato-kamchiliklarni farqlash kerak. Xato – bu iqtisodiy kategoriyalarni va qonunlarni noto‘g‘ri tushunish yoki yaxshi tushunmaslik sababli kelib chiqadi. Kamchiliklar – talabaning iqtisodiy kategoriya haqida tushunchasi bor, lekin to‘la emasligi, ko‘pincha muhim nazariy qoidalarning ahamiyatini etarlicha tushunmasligi tufayli kelib chiqadi. SHuning uchun ham talabaga o‘qituvchining maslahati katta yordam beradi.