Мавзу №1: шаҳар ҳудудларида жамоат тартиби ва хавфсизлигини таъминлашни ташкил этиш тартиби ва йўналишлари

Фуқароларни жамоат хавфсизлигини таъминлашга жалб қилиш бўйича чекловлар
Жамоат хавфсизлигини таъминлашга қуйидаги фуқаролар жалб этилишига йўл қўйилмайди:
16 ёшга тўлмаганлар;
экстремистик фаолиятга ёки терроризмга алоқадорлиги ҳақида ишончли маълумотлар мавжуд бўлганлар;
маъмурий назоратга олинганлар;
жиноят содир этганликда айбланаётган шахслар;
руҳий ҳолати бузилган, сурункали ичкиликбозликка, гиёҳвандликка ёки заҳарвандликка чалинганлар;
муомалага лаёқатсиз ёки муомала лаёқати чекланган деб топилганлар;
чет давлат фуқаролигига (мансублигига) эга бўлганлар.
Фуқароларнинг жамоат хавфсизлигини таъминлашга жалб этилиши бошқа сабабларга кўра чекланишига йўл қўйилмайди.
Фуқароларни уларнинг ҳаёти ва соғлиғига таҳдид солиши мумкин бўлган жамоат хавфсизлини таъминлаш тадбирларига жалб этиш тақиқланади.


Жамоат тартибини сақлаш ва жамоат хавфсизлигини таъминлашда иштирок этувчи фуқароларни ҳуқуқий ва ижтимоий ҳимоя қилиш
Жамоат тартибини сақлаш ва жамоат хавфсизлигини таъминлашда иштирок этувчи фуқаролар жамоат тартибини сақлаш ва жамоат хавфсизлигини таъминлашда зиммаларига юклатилган вазифаларни бажаришлари давомида давлат томонидан ҳимоя қилинади. Уларнинг ноқонуний ҳаракатларни тўхтатиш борасидаги қонуний талаблари барча фуқаролар ва мансабдор шахслар учун мажбурийдир.
Фуқароларни уларнинг розилигисиз жамоат тартибини сақлаш ва жамоат хавфсизлигини таъминлашда иштирок этишга мажбур қилишга ҳеч ким ҳақли эмас.
Давлат органлари, маҳаллий фуқароларнинг ўзини ўзи бошқариш органлари ва ташкилотлар жамоат тартибини сақлаш тадбирларида иштирок этиш муддатига фуқароларни шахсий суғурта қилишлари мумкин.
«Фидокор ёшлар» жамоат патруль гуруҳлари, ҳуқуқни муҳофаза қилувчи органлар ва хавфсизлик тузилмаларига кўмаклашиш отрядлари (командалари, гуруҳлари), жамоат тартибини сақлаш бўйича кўнгилли жамоалар (отрядлари, командалари, гуруҳлари)нинг аъзоси жамоат тартибини сақлаш ва жамоат хавфсизлигини таъминлаш вазифаларини бажариши жараёнида вақтинча меҳнат лаёқатини йўқотган тақдирда унга меҳнат лаёқатини йўқотган кундан эътиборан меҳнатга лаёқати тиклангунига қадар қонун ҳужжатларида белгиланган тартибда ўртача ойлик иш ҳақининг 100 % миқдорида вақтинча меҳнатга қобилиятсизлик нафақаси тўланади.
Ҳуқуқни муҳофаза қилувчи органлар томонидан жамоат хавфсизлигини таъминлашга жалб этилган фуқаронинг ўз мажбуриятларини бажариши чоғида соғлиғига зарар етказилган тақдирда, ушбу шахсга етказилган зарар қопланиб, қонунда белгиланган тартибда ва миқдорда бир марталик нафақа тўланади.
Жамоат тартибини сақлаш ва жамоат хавфсизлигини таъминлаш бўйича вазифаларини бажариши муносабати билан «Фидокор ёшлар» жамоат патрул гуруҳлари, ҳуқуқни муҳофаза қилувчи органларга кўмаклашиш отрядлари (командалари, гуруҳлари) аъзосига ёки унинг яқин қариндошлари (ота-онаси, фарзандлари, фарзандликка олинганлар, турмуш ўртоғи)га тегишли бўлган мулкка шикаст етказиш ёки йўқ қилиш йўли билан етказилган зарар қонун ҳужжатларига мувофиқ қопланади.
Давлат органлари, маҳаллий давлат ҳокимияти органлари, фуқароларнинг ўзини ўзи бошқариш органлари ва ташкилотлар, шу жумладан жамоат бирлашмалари томонидан жамоат тартибини сақлаш ва жамоат хавфсизлигини таъминлашда фаол иштирок этаётган фуқаролар учун ижтимоий ҳимоянинг қўшимча кафолатлари ўрнатилиши мумкин.
 Жамоат тартибини сақлаш ва жамоат хавфсизлигини таъминлашда иштирок этаётган фуқароларни рағбатлантириш чоралари
Органлар ва муассасалар жамоат тартибини сақлаш ва жамоат хавфсизлигини таъминлашда фаол иштирок этаётган ва ўзини кўрсатган фуқаролар учун ижтимоий, иқтисодий ва бошқа рағбатлантириш чораларини ва имтиёзларни қўллашлари мумкин.
Жамоат тартибини сақлаш, ҳуқуқбузарликлар профилактикаси ва жиноятчиликка қарши курашиш борасида амалий кўмаклашишда алоҳида ўрнак кўрсатган “Фидокор ёшлар” патруль гуруҳлари, ҳуқуқни муҳофаза қилувчи органларга кўмаклашиш отрядлари (командалари, гуруҳлари), жамоат тартибини сақлаш бўйича кўнгиллилар (отрядлар, командалар, гуруҳлар)нинг аъзолари меҳнатга ҳақ тўлаш фонди (пул таъминоти)нинг 100 фоизигача бўлган пул мукофоти ва қимматбаҳо совға билан тақдирланиши мумкин;
Давлат органлари, маҳаллий ўзини ўзи бошқариш органлари фуқарога жамоат тартибини сақлаш ва жамоат хавфсизлигини таъминлашда фаол иштирокини тасдиқловчи ҳужжат бериши мумкин, ушбу ҳужжат фуқаронинг ишга (хизматга, ўқишга) қабул қилинишида қонун ҳужжатларида назарда тутилган қўшимча имтиёзлардан фойдаланишига асос бўлиши мумкин.
Жамоат хавфсизлигини таъминлашда кўрсатган алоҳида хизматлари ҳамда мардлик ва қаҳрамонлиги учун фуқаролар қонун ҳужжатларида белгиланган тартибда давлат мукофотлари билан тақдирлашга тавсия этилишлари мумкин.