O‘zbekiston Respublikasida raqamli iqtisodiyotni rivojlantirish

O‘zbekiston Respublikasida raqamli iqtisodiyotni rivojlantirish.

Inomov Yunusbek Paxlavon o’g’li, Magistr,

Muxammad Al-Xorazmiy nomidagi Toshkent axborot texnologiyalari universitedi.
Kirish: Hozirgi kunda raqamli iqtisodiyotni rivojlantirish asosida mamlakat iqtisodiyoti jadal o‘sish sur’atlariga erishish mamlakatimiz iqtisodiyoti oldida turgan eng dolzarb masala hisoblanadi. Raqamli iqtisodiyot bugungi kunda dunyoning ko‘plab mamlakatlari iqtisodiyotiga jadal kirib bormoqda. Raqamli texnologiyalarning tez sur’atlar bilan rivojlanishi, iqtisodiyotning globallashuv jarayonlarini tezlashtirishini yuzaga keltirdi. Iqtisodiyotning barcha jabhalarida ulardan samarali tarzda foydalanish bugungi kun talabiga aylanmoqda.
Kalit so'zlar: raqamli iqtisodiyot, iqtisodiy o‘sish, makroiqtisodiy barqarorlik, iqtisodiyot, YaIM, yashirin iqtisodiyot.
Raqamli iqtisodiyot – bu noldan boshlab yaratilishi lozim bo‘lgan qandaydir boshqacha iqtisodiyot emas. Bu yangi texnologiyalar, platformalar va biznes modellari yaratish va ularni kundalik hayotga joriy etish orqali mavjud iqtisodiyotni yangicha tizimga ko‘chirish deganidir.

Raqamli iqtisodiyotni rivojlantirish asosida mamlakatdagi mavjud barcha soha va tarmoqlarda qo‘shimcha qulayliklar hamda qo‘shimcha imkoniyatlar yaratiladi. Bu ham davlatga, ham aholiga va eng asosiysi tadbirkorlarga qo‘shimcha foyda deganidir. Raqamli iqtisodiyotning rivojlanishi mamlakatda tadbirkorlik qilishga undovchi, qulay ishbilarmonlik muhiti hamda qulay investitsion muhitning shakllanishiga ijobiy ta’sir qiluvchi omillardan biri hisoblanadi. Shundan kelib chiqib aytish mumkin-ki, bugungi kunda O‘zbekistonda raqamli iqtisodiyotni rivojlantirish juda muhim hisoblanadi. Bundan kelib chiqib mamlakatimiz Prezidenti Shavkat Miromonovich Mirziyoyev quyidagi fikrlarni bildirib o‘tgan edilar: “Taraqqiyotga erishish uchun raqamli bilimlar va zamonaviy axborot texnologiyalarini egallashimiz zarur va shart. Bu bizga yuksalishning eng qisqa yo‘lidan borish imkoniyatini beradi. Zero, bugun dunyoda barcha sohalarga axborot texnologiyalari chuqur kirib bormoqda”.