Bog'liq Ajratish punktlari , ularning vazifalari, turlari va qo`llanilishi
Yo’lning foydali uzunligi to’liq uzunligining harakat tartiblari (poyezd) joylashadigan qismi bo’lib, harakat tartiblarining turishi yondosh yo’llardagi harakatga xalaqit bermasligi kerak. Chiqish signallari bo’lmagan ochiq yo’llarning foydali uzunligi shu yo’llarga taalluqli strelkali o’tkazgichlarning chegara qoziqchalari bilan chegaralanadi, berk yo’lning foydali uzunligi esa bir tomondan strelkali o’tkazgich chegara qoziqchasi yoki strelka boshlanishidan ikkinchi tomonda yo’l oxiridagi to’siqqacha hisoblanadi. Agar yo’llar chiqish signallari bilan jihozlangan bo’lsa, u holda ochiq yo’lning foydali uzunligi bir tomondan chiqish signali va ikkinchi tomondan chegara qoziqchasigacha, yoki strelka boshigacha hisoblanadi. Chegara qoziqchasi strelkali o’tkazgichdan tarmoqlanuvchi yo’l o’qlari orsidagi kenglik 4100mm bo’lgan joyda qo’yiladi va ushbu chegara qoziqchasidan o’tib to’xtash yon yo’ldagi harakatga xavf tug’dirmaydi. Strelkali o’tkazgich markazidan chegara qoziqchasigacha yoki signalchaga bo’lgan masofa krestovina markasi, krestovinadan keyingi egrilik radiusi va yo’nalishiga, yo’l oralig’i kengligi va svetofor tagligining kengligiga bog’liq bo’lib hisoblab topiladi. Magistral temir yo’llarda stansiya yo’llarining foydali uzunligi 1250, 1050 va 850m standart uzunlikda loyihalanadi. Yangi I va II darajali temir yo’llarda esa yo’llarning foydali uzunligi 1050m.dan kam bo’lmasligi kerak. Yo’lovchi poyezdlarini o’tkazish, qabul qilish va saqlash yo’llarining foydali uzunligi ushbu yo’lda muomalada bo’lish uchun mo’ljallangan poyezdlar uzunligidan kam olinmaydi. Keyingi yillarda yo’lovchi poyezdlarining tartibi 24 vagondan, shaharatrof elektrpoyezdlarini 12 yoki 14 vagondan ortiq uzunlikda tuzish amalga oshirilmoqda. Bunda stansiya yo’llari va platformalar uzunligini tegishlicha uzaytirish ko’zda tutiladi. Stansiyalarda saralash yo’llarining uzunligi tuziladigan poyezdlardan 10% uzunroq olinadi. Saralash va uchastka stansiyalarida manyovr tortish yo’llarining uzunligi poyezd tartiblarining to’liq uzunligiga, oraliq stansiyalarida esa kamida yarim poyezd uzunligiga teng olinadi. Ehtiyot berk yo’llarining foydali uzunligi kamida 50m, tutib qoluvchi berk yo’llar uzunligi esa tegishli hisoblar bo’yicha olinadi. Stansiyalarning har bir yo’li va strelkali o’tkazgichlari raqamlanadi. Bosh yo’llar rim raqamlari, qolganlari esa tartib bo’yicha arab raqamlari bilan belgilanadi. Strelkali o’tkazgichlar juft raqamli poyezdlar keladigan tomondan birinchi strelkadan boshlab tartib bo’yicha juft, toq yo’nalish poyezdlari tomonidan esa toq arab raqamlari bilan belgilanadi. Juft va toq tomonlarni ajratish chegarasi qilib stansiya yo’lovchi binosining o’q chizig’i, yoki katta stansiyalarda alohida parklarning o’rtasidagi yo’larga ko’ndalang o’q chizig’i olinadi.