Bog'liq Ajratish punktlari , ularning vazifalari, turlari va qo`llanilishi
Bo’ylama turdagi qabul-jo’natish yo’llari o’zaro ketma-ket joylashgan razyezdlar (rasm 12.3a) tutash peregonlar uzunligini bir oz qisqartirish va razyezd orqali uzaytirilgan va qo’shma poyezdlarni o’tkazish imkonini berib, yo’lning poyezd o’tkazish qobiliyatini oshiradi. Ushbu afzalliklar va bosqichli rivojlanish imkoniyatlarini hisobga olib bo’ylama turdagi razyezdlar yaqin kelajakda ikkinchi bosh yo’l yoki ikki yo’llik qo’shimchalar qurilishi, hamda uzaytirilgan va qo’shma poyezdlar o’tkazilishi mo’ljallangan liniyalarda asosiy chizma sifatida tavsiya etiladi.
Ushbu holatlarda stansiya maydoni uzunligi yetarli bo’lmasa bo’ylama turdagi razyezd imkoniyatlari va qulayliklariga yaqin bo’lgan yarim bo’ylama turdagi (rasm 12.3b) razyezdlarni qurish tavsiya etiladi. Yarim bo’ylama turdagi razyezdlarda yo’lovchi poyezdlari, shu jumladan to’xtab o’tadigan yo’lovchi va shaharatrof poyezdlarini ham bosh yo’l orqali o’tkazish ko’zda tutiladi. Shuning uchun bosh yo’l bo’ylab muomaladagi yo’lovchi poyezdlari sig’adigan uzunlikda yo’lovchi platformasi va stansiya binosi quriladi. qabul-jo’natish yo’llarining biri yo’lovchi inshootlariga parallel va ikkinchisi (qarama-qarshi tomon uchun) yo’lovchi poyezdlarining chiqish signalidan keyin ketma-ket quriladi.
Ko’ndalang turdagi razyezdlarda (rasm 12.3v) qabul-jo’natish yo’llari o’zaro parallel joylashgan bo’lib, uni qurish uchun eng qisqa maydon uzunligi talab etiladi. Bunday razyezdlar asosan III va IV darajali liniyalarda, hamda qiyin topografik sharoitlarda I va II darajali liniyalarda ham tavsiya etiladi. Ko’ndalang turdagi razyezdlarda qarama-qarshi tomondan kelayotgan poyezdlarni baravariga qabul qilishda harakat xavfsizligini ta’minlash qiyinroq va harakat jarayoni esa poyezd mashinistlari uchun diqqatliroq bo’ladi. Yuk poyezdlari ko’p bo’lgan, avtoblokirovka yoki dispetcherlik markazlashtirishi bilan jihozlangan liniyalarda razyezdning biror qabul-jo’natish yo’lini uzaytirish hisobiga qarama-qarshi yo’nalish poyezdlarini o’zaro to’xtatmay o’tkazish yo’li bilan yo’llarning poyezd o’tkazish qobiliyatini oshirishga erishiladi. Yo’lning bunday uzaytirilishi ikki yo’lliq qo’shimcha (dvuxputnaya vstavka) deb ataladi va uning uzunligi maxsus beto’xtov kesishuv hisoblari bo’yicha aniqlanadi.