ŞƏKİ rayonunun makromisetləRİNƏ daiR İlk məlumatlar

Material və metodlar
Tədqiqat obyektləri əsasən Şəki şəhəri (GPS: N0 42°12′15.66″; E0 47°11′54.39″), rayonun ərazisində yerləşən Marxal istirahət kompleksi (GPS: N0 41°15′16″; E0 47°12′44″), Narınqala istirahət kompleksi (GPS: N0 41˚14'53˝; E0 47˚11'21,81˝), Küngüt kəndi (GPS: N0 42°09′38″; E0 47°18′48″), Xan yaylağı (GPS: N0 41°12′59″; E0 47°11′56″) və Zəyzid kəndi (GPS: N0 41°08′18″; E0 47°14′18″) ətrafından toplanılmışdır. Toplanmış nümunələrin morfo-parametrləri qeyd edilmiş, rəqəmsal kamera ilə şəkilləri çəkilmiş, nümunələr qurudularaq herbariləşdirilmişdir (Cədvəl). Bu zaman göbələklərin tam qurudulmasına, həşərat sürfə­lərindən uzaq tutulmasına xüsusi diqqət yetirilmişdir. Herbariləşdirilmiş göbələklərin sporlarından pereparatlar hazırlanmış, mikroskopda onların quruluşu və ölçülərinə baxılmış və qeydlər aparılmışdır. Əvvəlki illər toplanılmış və İnsti­tu­tun mikoloji herbarisində saxlanılan az saylı nümunələr də tədqiqat işinə daxil edilmişdir. Göbələk növlərinin təyinatında müvafiq təyinedi­cilərdən [1, 2, 3, 4, 5, 6, 7, 8] istifadə edilmişdir. Hər bir növ üçün elmi adı, lazım gəldikdə bazionimi (Bas.) və mühüm sinonimi (Syn.) göstərilmişdir.
Nəticələr
Tədqiqat işinə 30-dan çox nümunə cəlb edilmişdir. Aşağıda təyin edilmiş taksalar barədə ətraflı məlumat verilir.
ASCOMYCOTA
Pezizales, Helvellaceae
Acetabula sulcata (Pers.) Fuckel.; Bas.: Peziza sulcata Pers.
Təsviri: Apatetsi (meyvə cismi) tək-tək və ya qrup halındadır. Yeni fərdlərdə qapalı olub, tam yetişdikdə açılaraq sərilir. Diametri 2-3(5) sm. Himena qatı boz rəngdədir. Ayaqcığın aşağı tərəfi dardır, azacıq yuxarıdan qalınlaşır, zirvədə yenidən daralır, ağımtıl-boz rənglidir. Kisələr silindrik olub uc hissəsi dairəvidir. 300 x 15-18 µm. Spor ellipsvaridir, mərkəzində iri yağdamlası var. Hamardır. Sporların ölçüləri 18-24 x 12-14 µm.
Toplanılıb: Zəyzid kəndi ərazisində Qarasu əkin sahəsinin ətrafındakı enliyarpaqlı meşə ərazisində. 22.05.2008.