1-мавзу. Ислом ҳуқуқи предмети, методлари ва асосий тушунчалари Ислом ҳуқуқининг предмети

Ислом ҳуқуқининг ўзига хос хусусиятлари:

1. 
   Диний эътиқод ва шариат аҳкомлари билан боғланган. Яъни Ислом динининг пайдо бўлиши ва Қуръони-каримнинг нозил бўлиши билан яратилган ҳуқуқий тизимдир.
   
2. 
   Ислом ҳуқуқи жамият учун эмас, балки жамият унинг учун. У кимнинг иродаси, хохиши ёки ақлий тафаккур натижаси эмас, балки нозил бўлган диний аҳкомлардир.
   
3. 
   Унинг асослари ўзгармасдир, туб қоидаларига ўзгартиришлар киритилмайди, ислоҳ қилинмайди.
   
4. 
   Исломда нормалар иерархияси мавжуд: Қуръон-сунна-ижмоъ-қиёс
   
5. 
   Ислом ҳуқуқи нафақат бугунни балки келажак учун буюрилган қоидалардир, унда исломга чорлаш, даъват тушунчаси мавжуд.
   
6. 
   Ислом ҳуқуқининг ўзига хос категориялари, институтлари мавжудки, улар фақат мусусмон ҳуқуқи учун хосдир, бошқа диний ёки дунёвий ҳуқуқий тартиботларда учрамайди:
   

Талоқ, вақф, мубоҳ – шариат томонидан берилган ихтиёр, қасам
"Ислом ҳуқуқи" фанининг предмети тўғрисида сўз юритганда, доим бошқа мамлакатларнинг ҳуқуқ фанидан Ислом ҳуқуқининг умумий ва ўзига хос фарқларини таҳлил қилиш лозим. Бунда доим барча мусулмонлар учун умумий қонун–қоидалар мажмуи – Ислом ҳуқуқи мавжудлигини, у мусулмонлар ҳаётида бир хилда қўлланилишини эътиборга олиш зарур. Ислом ҳуқуқи асослари билан танишмоқчи бўлган ҳар бир инсон, аввало, ҳуқуқ ҳақидаги ҳозирги замон Европа фанининг тушунчалари ва тамойиллари Мусулмон қонунчилик тизимига мос келмаслигини ҳисобга олиши лозим.
Ислом ҳуқуқининг фан сифатидаги предмети – Ислом ҳуқуқининг пайдо бўлиши, ривожланиши, асосий институтлари, таркибий тузилиши, манбалари, ўзига хос хусусиятлари, норма ижодкорлиги ва ҳуқуқни қўллаш амалиётини ўрганишдир.
Фаннинг мақсади. "Ислом ҳуқуқи" фанини ўқитилишидан мақсад Ислом ҳуқуқини ундаги давлат ва ҳуқуқ ғояси, инсониятнинг маънавий маданиятига қўшган ҳиссаси, умумжаҳон маданиятининг ажралмас бўлаги ва мустақил ҳуқуқий тизим сифатида шаклланиши, юртимишдан чиққан фақиҳларнинг ҳуқуқий ғояларини, ўн асрдан кўпроқ муддат юртимизда амалда бўлган Ислом ҳуқуқининг хусусиятини, ўзига хос жиҳатларини ўрганишдан иборатдир.
Ушбу мақсадларда Ислом ҳуқуқи ўқув фани сифатида қуйидаги йўналишлар бўйича ўргатиш муҳим рол ўйнайди:

1. 
   Ислом ҳуқуқи – Ислом ҳуқуқи назарияси ва тарихи, Ислом ҳуқуқи ғоялари тарихи.
   
2. 
   Ислом ҳуқуқи - мусулмонлар ҳаётининг муҳим элементи.
   
3. 
   Шарқ ҳуқуқий тизимларида Ислом ҳуқуқи: тарихи ва бугуни.
   
4. 
   Ислом ҳуқуқи ва инсон ҳуқуқлари.
   
5. 
   Республикамиз ижтимоий-норматив ва маънавий маданиятида Ислом ҳуқуқи.
   
6. 
   Ҳокимият ва бошқа сиёсий концепциялар хақидаги қарашларнинг ҳуқуқий муаммолари.
   
7. 
   Бугунги кун Ислом ҳуқуқи тузилмаси, шакли ва таркибидаги Ислом ҳуқуқининг соҳавий муаммолари.