Tanlov talabgorlarining takliflarini ko‘rib chiqish va baholash Talabgorlarning taqdim etgan takliflari Komissiya tomonidan belgilangan muddatda ochiladi. Talabgorlarning takliflari joylashtirilgan konvertlarni ochish jarayonida Komissiya tomonidan texnik, moliyaviy, moddiy, kadrlar, narx takliflari o‘rganib chiqiladi. Komissiyaning texnik, moliyaviy, moddiy, kadrlar, narx takliflari bo‘yicha qarori tanlov g‘olibini aniqlash bo‘yicha yig‘ilish bayonida ko‘rsatiladi. E’londa tanlovni o‘tkazish bo‘yicha belgilangan muddatda Komissiya talabgorlar tomonidan berilgan takliflarni baholash maqsadida navbat bilan ochadi. Talabgorlarning taqdim etgan takliflari Komissiyaning yig‘ilishida ochiladi. Tanlov talabgorlarining takliflarini ko‘rib chiqish va baholash muddati takliflar berish tugagan paytdan e’tiboran o‘n kundan ko‘p bo‘lishi mumkin emas. Takliflar topshirish muddati tugamasdan oldin har bir lotga kamida uchta talabgor tomonidan tanlov hujjatlarida ko‘rsatilgan talablarga muvofiq takliflar topshirilgan taqdirda tanlov o‘tkaziladi.
Tanlovdagi lot bo‘yicha faqatgina bitta talabgor taklif kiritgan bo‘lsa yoki takliflar kelib tushmagan bo‘lsa, ushbu lot bo‘yicha tanlov o‘tkazilmaydi va qayta tanlov e’lon qilinadi. Tanlov qayta o‘tkazilganda o‘n ish kuni davomida tasdiqlangan mezonlarga muvofiq qayta tanlov o‘tkazish bo‘yicha e’lon beriladi.
Komissiya agar talabgor tomonidan taqdim etilgan hujjatlar tanlov hujjatlarida qo‘yilgan talablarga javob bermasa taklifni rad etishga haqli bo‘ladi. Takliflarni ochish jarayoni tanlov tashkilotchisi tomonidan videotasmaga tushuriladi. Konvertlarni ochish jarayonida taqdim qilingan hujjatlar hamda tijorat takliflari baland ovozda tanishtirib boriladi. Konvertlarni ochish jarayonida talabgor tomonidan taqdim etilgan hujjatlar Komissiya tomonidan bir bosqichda ko‘rib chiqiladi.
Malaka talablari hujjatlari mazkur Tartibning 1-ilovasida (1 — 6-shakllar) asosida tashqi konvertga joylashtirilib muhrlangan holda tanlovda ishtirok etish bo‘yicha ariza konvertga yopishtirilgan holda bo‘lishi shart.
Tanlovda dastlab Komissiya tomonidan talabgorlarni malaka talablari tanlovi o‘tkaziladi. Malaka talablari tanlovidan o‘tmagan talabgorlarning ichki konverti (texnik va tijorat taklifi) ochilmaydi va talabgor tanlovdan chetlatiladi.
Konvertlarni ochish jarayonida talabgorning barcha hujjatlari mavjudligi va ularning belgilangan tartibda rasmiylashtirilganligi, ya’ni muhrlanganligi, raqamlanganligi, sanalari to‘g‘ri qo‘yilganligi Komissiya tomonidan tekshiriladi.
Konvertda tegishli hujjatlar tanlov hujjatlari talablariga mos rasmiylashtirilmagan yoki belgilangan tartibdagi hujjatlar taqdim qilinmagan bo‘lsa, Komissiya ushbu talabgorning taklifini ko‘rib chiqmaydi, talabgor tanlovdan chetlatiladi.Komissiya malaka talabidan o‘tgan talabgorlarni takliflarni tanlov hujjatlari asosida belgilangan mezonlar bo‘yicha baholaydi va g‘olibni aniqlaydi.
Tanlov hujjatlarida va taklifda ko‘rsatilgan mezonlar asosida shartnomani bajarishning eng yaxshi shartlarini taklif qilgan tanlov talabgori g‘olib deb topiladi. Komissiya g‘olib va zaxiradagi g‘olibni aniqlaydi va tanlovni o‘tkazildi deb hisoblaydi. Tanlov hujjatlarida har bir ko‘rsatiladigan xizmat alohida lot bo‘yicha ko‘rsatilishi qayd etilgan bo‘lsa, Komissiya har bir lot uchun alohida g‘olibni aniqlaydi. Tanlov o‘tkazish bo‘yicha Komissiyaning har bir a’zosi ovoz berishda yoqlab ovoz berishi, qarshi ovoz berishi yoki unda ishtirok etishdan bosh tortishi mumkin. Komissiyaning raisi ovoz berishda ishtirok etishdan bosh tortish huquqiga ega emas. Komissiyaning majlislari yuzma-yuz va videokonferensiyalar shaklida o‘tkazilishi mumkin.
Komissiya ko‘pchilik komissiya a’zolari ma’qullagan takliflarga ko‘ra qaror qabul qiladi. Tanlov hujjatlariga muvofiq tayyorlangan taklif to‘g‘ri rasmiylashtirilgan taklif deb qabul qilinadi. Baholash paytida Komissiya tanlov talabgorlaridan takliflari bo‘yicha tushuntirishlar so‘rashga haqli. Mazkur jarayon rasmiy ravishda videotasmaga yozib olinadi va belgilangan tartibda olib boriladi. Tushuntirish jarayonida taklifning mohiyati, shuningdek, narxi yuzasidan biror-bir o‘zgartirishlarga yo‘l qo‘yilmaydi va qo‘shimcha hujjatlar qabul qilinmaydi.
Shuningdek, sirtdan (so‘rov orqali, barchaning ishtirokisiz) tanlov o‘tkazilishi mumkin.
Malaka talablari tanlovidan o‘tgan talabgorlarning texnik va tijorat takliflari mazkur Tartibning 4-ilovasida belgilangan mezonlar asosida baholanadi. Har bir komissiya a’zosi ushbu Tartibning 5-ilovasida belgilangan namunadagi shaklda baholash varaqasini to‘ldiradi va imzolaydi, tanlov yakuniga ko‘ra imzolangan baholash varaqasi Ishchi organiga topshiriladi. Jamlangan baholash varaqasi umumlashtirilib, Komissiya g‘oliblarni aniqlaydi. Tanlovning istalgan talabgori takliflarni ko‘rib chiqish va baholash bayonnomasi e’lon qilinganidan so‘ng buyurtmachiga tanlov natijalariga doir tushuntirishlarni taqdim etish to‘g‘risida so‘rov yuborishga haqli.
Buyurtmachi bunday so‘rov kelib tushgan sanadan e’tiboran uch ish kunida tanlov talabgoriga tegishli tushuntirishlarni taqdim etishi shart. Tushuntirishlarni taqdim etish to‘g‘risida so‘rovidan boshqa murojaatlar qonunda belgilangan tartibda ko‘rib chiqiladi. Tanlov yakunlangandan so‘ng bir kun ichida takliflarni ko‘rib chiqish hamda baholash natijalari bayonnomada qayd etiladi hamda komissiyaning raisi va barcha a’zolari tomonidan imzolanadi. Takliflarni ko‘rib chiqish va baholash bayonnomasida quyidagi ma’lumotlar bo‘lishi shart:
-tanlov takliflari ko‘rib chiqiladigan hamda baholanadigan sana va vaqt to‘g‘risida;
-ishtirok etgan Komissiya a’zolarining hamda talabgorlar vakolatli vakillarining tarkibi haqida;
-takliflari ko‘rib chiqilgan tanlov talabgorlari to‘g‘risida;
-rad etishning aniq sabablari ko‘rsatilgan holda rad etilgan tanlov talabgorlari haqida;
-tanlov g‘olibi to‘g‘risida qabul qilingan qaror haqida;
-tanlov g‘olibining nomi va yuridik manzili.
Bayonnomadan ko‘chirma imzolangan kundan e’tiboran uch ish kuni ichida maxsus axborot portalida va O‘zbekiston Respublikasi Maktabgacha ta’lim vazirligining www.mdo.uz veb-saytida e’lon qilinadi.
