Loyiha matni 49901-(61999)

120-modda. Tartibga solish taʼsirini baholash
Tartibga solish taʼsirini baholash normativ-huquqiy hujjat loyihasining qabul qilinishi natijasida
yuzaga kelishi mumkin boʻlgan ehtimoliy oqibatlarni va uning tartibga solish maqsadlariga erishilishini,
shuningdek, amaldagi normativ-huquqiy hujjatning ushbu normativ-huquqiy hujjat bilan tartibga soluvchi
munosabatlarga taʼsirining samaradorligi va natijadorligini aniqlash hamda baholashga qaratilgan chora-
tadbirlar majmuidan iboratdir.
Tartibga solish taʼsirini baholash normativ-huquqiy hujjatlar tartibga solish vositasini joriy
etishdan oldin va keyin, shu jumladan tartibga solish taʼsirini baholash ilgari oʻtkazilmagan amaldagi
mavjud tartibga solish vositalariga nisbatan ham amalga oshiriladi.
Joriy etilgan hamda amaldagi tartibga solish vositalarining tartibga solish taʼsirini baholash
qonunchilikda belgilangan tartibda har yili Vazirlar Mahkamasi tomonidan tasdiqlanadigan rejaga
muvofiq amalga oshiriladi.
Tartibga solish taʼsirini baholash natijalariga koʻra, tartibga solish vositasi uni qoʻllash
samaradorligiga qarab bekor qilinishi yoki qayta koʻrib chiqilishi mumkin.
Tartibga solish vositasi joriy etilgan paytda ilgari surilgan maqsadlariga erishilmagan taqdirda,
bunday tartibga solish vositalari bekor qilinishi zarur.
Tadbirkorlik subyektlari yoki ularning birlashmalari kutilgan samarani bermagan tartibga solish
vositalarini bekor qilish yoki qayta koʻrib chiqish haqida Oʻzbekiston Respublikasi Savdo-sanoat
palatasiga shikoyat qilishi va (yoki) takliflar bildirishi mumkin.
Oʻzbekiston Respublikasi Savdo-sanoat palatasi tadbirkorlik subyektlarining tartibga solish
vositasini bekor qilish yoki qayta koʻrib chiqish haqidagi shikoyat va (yoki) takliflarini koʻrib chiqadi,
tartibga solish vositasini baholashdan oʻtkazadi va vakolatli organlarning xulosasini olgan holda uni
bekor qilish yoki qayta koʻrib chiqish masalasini Hukumatga kiritadi.

---