O’quv adabiyoti

52-rasm. 7 yoshli bolaning tizza bo’g’imi rentgenogrammasi.
1-son suyagi
2-son suyagining pastki uchi;
3-tog’ay qatlam;
4-bo’g’im bo’shlig’i;
5-katta boldir suyagining yuqori uchi;
6-katta boldir suyagi;
7-kichik boldir suyagi boshchasi;
8-kichik boldir suyagi.





Xochsimon boylamlar qisqa va tizza bo’g’imida yozishni chegaralab turadi. Bo’g’imning taraqqiyoti 18 yoshlargacha davom etadi.

Boldir suyaklarining o’zaro birlashuvi

Katta va kichik boldir suyaklari o’zaro uzluksiz va uzlukli birlashmalar vositasida birikadi.

Boldir suyaklari o’rtasidagi bo’g’im (articulatio tibiofibularis) kichik boldir suyagining boshchasi bo’g’im yuzasi bilan katta boldir suyagining kichik boldir bo’g’im yuzasi o’rtasida bo’ladi. Ikkala bo’g’im yuzasi ham yassi. Bo’g’im xaltasi tarang bo’lib, bo’g’im yuzalarining chekkasiga birikadi. Bo’g’im xaltasini tashqi tomondan ikki suyak o’rtasida tortilgan kichik boldir suyagi boshchasini oldingi boylami (lig. capitis fibulae anterior) va kichik boldir boshchasini orqa boylami (lig. capitis fibulae posterior) mustahkamlab turadi. Bu bo’g’imda harakat chegaralangan.
Boldir suyaklarining pastki uchlari o’zaro uzluksiz birlashma boldir suyaklariaro sindesmoz (syndesmosis tibiofibularis) hosil qilib birlashadi. Bu birlashmada katta boldir suyagining kichik boldir o’ymasi va lateral to’piqning bo’g’im yuzasi ishtirok etadi. Bu bo’g’im harakatsiz bo’lib, tashqi tomondan lateral to’piq va katta boldir suyagi o’rtasida tortilgan oldingi va orqa boldir suyaklariaro boylamlar (ligg. tibiofibulare anterius et posterius) mustahkamlab turadi. Bu ikki birlashmadan tashqari boldir suyaklarining suyaklararo qirralari o’rtasida suyaklararo parda (membrana interossea cruris) tortilgan. Bu parda bilakdagiga nisbatan qalin va mustahkam. Uning yuqori va pastki qismlarida qon tomirlar uchun teshiklar bor.