Radiokanal tarixi O`zbekiston milliy teleradiokompaniyasining «O`zbekiston»

Maqsadi va asosiy vazifalari
Hozirda «O`zbekiston» radiokanali dasturlari O`zbekiston Respublikasi Prezidentining 2005 yil 8 noyabrdagi «Mustaqil teleradiokanallarni isloh qilish va rivojlantirish chora-tadbirlari to`g`risida»gi farmonida belgilab berilgan ustivor vazifalarni izchil bajarish, mamlakat siyosiy, iqtisodiy, ijtimoiy, madaniy hayotida ro`y berayotgan muhim voqealarni yoritish va tahlil qilishga, huquqiy demokratik davlat va ochiq fuqarolik jamiyatini shakllantirishga, aholining ta’lim va madaniy saviyasini oshirishga, milliy an’analarni, tarixiy va ma’naviy merosni saqlab qolishga, yoshlar va o`sib kelayotgan avlodni vatanparvarlik, Vatanga muhabbat va umuminsoniy qadriyatlarni hurmat qilish ruhida tarbiyalashga yo`naltirilgan.
Radiokanal eshittirishlari informatsion- tahliliy, ijtimoiy-siyosiy- iqtisodiy, ma’naviy-ma’rifiy-badiiy, ko`ngilochar-musiqiy-dam olish yo`nalishlaridan tarkib topgan.
Ijodiy jamoa izchil ravishda ushbu yo`nalishdagi eshittirishlarning professional va badiiy saviyasini izchil oshirib bormoqda.
Radiodasturlar internet tarmog`i orqali on-layn tizimida dunyoga tarqatiladi.
Efir soati: 22 soat.
Efir qamrovi: Respublika bo`ylab.
Qaysi auditoriya uchun faoliyat yuritadi
Aholining barcha qatlamlari, keng auditoriya uchun mo`ljallangan
Tarkibidagi muharririyatlar va ularning vazifalari
«Axborot» informatsion eshittirishlar muharriyatining har soatda efirga beriladigan «Axborot» dasturida mamlakatimizda va jahonda ro`y berayotgan muhim voqea va hodisalarga e’tibor qaratiladi. Jamiyatimizda kechayotgan islohotlar jarayoni, turli sohalarda qo`lga kiritilayotgan yutuqlar targ`ib qilinadi.
Keyingi yillarda eshittirishlar xajmi kengayibgina qolmasdan, sifati tubdan yaxshilandi. Eng asosiysi to`g`ridan-to`g`ri efirda beriladigan informatsion dasturlarda telefon orqali axborot uzatish yo`lga qo`yildi. 
«Ijtimoiy-siyosiy va sotsial-iqtisodiy eshittirishlar» muharririyati umumilliy ahamiyatga ega bo`lgan ijtimoiy-siyosiy va sotsial muammolar - iqtisodiyot, qishloq xo`jaligi, tadbirkorlik, fermerlar harakati, sog`liqni saqlash, ta’lim, madaniyat hamda ijtimoiy hayotning boshqa sohalarini rivojlantirish masalalariga doimiy e’tibor qaratadi.
Fuqarolarning ta’lim darajasini, siyosiy va huquqiy madaniyatini oshirish, mamlakat ijtimoiy-siyosiy va sotsial-iqtisodiy hayotining eng muhim yo`nalishlari bo`yicha dolzarb va muammoli mavzularda eshittirishlar tayyorlanadi. Muharririyatning «Shu kunning mavzusi», «Qishloq hayoti», «Iqtisod olamida», «Kim haq?», «Adashganlar qismati» kabi tahliliy-tanqidiy ruhdagi qator eshittirishlari radiotinglovchilar o`rtasida alohida tanilgan.