Referat ekanomikaliq teoriya pàninen «Bazar ekanomikasiniñ mazmuni hàm àmel etiwi talap hàm usinis teoriyasi»

monopsoniya bazarı, bul jerde satıwshı emes, al qarıydar monopoliyası boladı, yaǵnıy satıwshılar kóp bolǵan halda qarıydar birew boladı. Monopsoniya ádette resurslar bazarında boladı, bul jerde ayırım kárxanalar shiyki zat, janılǵı, jumıs kúshi sıyaqlı resurslardıń tiykarǵı bólegin satıp aladı. Eger monopoliya bazarında satıwshı qarıydarǵa óz húkimin ótkerse, monopsoniyada qarıydar satıwshıǵa óz húkimin ótkeredi.

Bazarlar óziniń obekti boyınsha, yaǵnıy qanday tovar hám xızmetlerdiń satılıwı - satıp alınıwı boyınsha da parqlanadı. Usı belgisi boyınsha tutınıw tovarları bazarı, resurslar bazarı, finans bazarı hám intellektual tovarlar bazarına ajıratıladı ⁹.
Tutınıw tovarları yamasa tutınıwshılar bazarı. Bul bazarda adamlardıń jeke mútájligin qanaatlandırıwshı, yaǵnıy olardıń tirishiligi ushın zárúr bolǵan tovarlar sawdası júz beredi.
Resurslar bazarı. Bul jerde túrli materiallıq resurslar hám jumıs kúshiniń sawdası júz beredi. Bul bazardıń qatnasıwshıları resurslardı óndiriwshiler hám olardı satıp alıwshı firmalar, mámleketlik shólkemler hám úy xojalıqlarınan ibarat.
Finans bazarı. Bul bazardıń arnawlı forması bolıp, bul jerde finanslıq resurslar, yaǵnıy pul hám dáramat keltiriwshi bahalı qaǵazlar sawdası ámelge asırıladı.

Bazar infrastrukturası hám onıń quramı

Bazardaǵı ekonomikalıq baylanıslarda kópshilikten ibarat subektler qatnasadı. Bul baylanıslar oǵada kóp túrli bolıp, quramalı ámelge asırıladı, bular tikkeley baylanıslar hám qosımsha baylanıslardan ibarat. Tikkeley bazar qatnasıǵı payda bolǵanda satıwshı hám qarıydar bir-biri menen tuwrıdan-tuwrı baylanıs ornatadı, bul jerde hesh kim olar ortasında dáldálshılıq etpeydi. Qosımsha bazar qatnasıǵı júz bergende satıwshı hám qarıydar ortasındaǵı baylanıslar dáldálshılar arqalı ornatıladı. Olar satıw-satıp alıw tarawında bazar qatnasıwshılarına óz xızmetin kórsetedi, bul infrastruktura xızmeti esaplanadı.