15-mavzu. Xizmatlar sohasi

Oʻzbekistonda xizmatlar sohasi rivojlanishini ifodalovchi ko'rsatkichlar

	2010	2015	2016
Yalpi ichki mahsulotda xizmatlar sektorining ulushi, %	46.9	48.7	49.5
Xizmatlar hajmi, mlrd. so'm	32749.8	75356.8	92536
Xizmatlar hajmining o'sish sur'ati, oʻtgan yilga nisbatan, %	116.1	114.0	114.5
Aholi jon boshiga koʻrsatilgan xizmatlar hajmi, ming so'm	911.7	2407.6	2905.6
Bandlikda xizmatlar sektorining ulushi, %	50.9	49.8	50.0
Asosiy kapitalga kiritilgan investitsiyalarda xizmatlar sektorining ulushi, %	62.3	54.1	57.4
Asosiy kapitalga kiritilgan chet el investitsiyalarida xizmatlar sektorining ulushi, %	75.5	25.8	24.6

Jadval ma'lumotlaridan ko'rinadiki, Oʻzbekistonda 2016-yilda 92,5 trln. so'mlik xizmatlar koʻrsatilgan boʻlib, oʻsish sur'ati 114,5 foizni tashkil etgan. Xizmatlar sohasi ish bilan band etishda ham muhim o'rin tutadi. Iqtisodiyotda band boʻlganlarning yarmi ushbu sohada faoliyat koʻrsatmoqda. 2016-yilda xizmatlar sektoriga kiritilgan investitsiyalarning umumiy hajmi jami investitsiyalarning 57,4 foizini, chet el investitsiyalarining 24,6 foizini tashkil etdi. Koʻrinib turibdiki, xizmatlar sektori mamlakat iqtisodiy faoliyatining qariyb yarmini qamrab olgan.
2016-yilda respublikada xizmatlar sohasida 16,5 mingdan ortiq yirik tashkilotlar (bozor xizmatlarini ko'rsatuvchi notijorat tashkilotlarini qo'shgan holda) va 126 mingdan ortiq kichik tadbirkorlik subyektlari faoliyat ko'rsatdi.
Xizmatlar sohasida aholiga pulli xizmat ko'rsatish alohida o'rin tutadi. 2016-yilda aholiga pulli xizmatlar hajmi 33174,5 mlrd. so'mni, uning o'sish sur'ati 2015-yilga nisbatan 109,3 foizni tashkil etdi. Aholiga pulli xizmatlar koʻrsatishning asosiy qismi rasmiy sektor tomonidan amalga oshirilib, hajmning 60,7 foizini tashkil etdi.
2016-yilda xoʻjalik yurituvchi subyektlarning mulkchilik shakllari bo'yicha aholiga koʻrsatgan xizmatlar hajmi

	Mlrd, so'm	Umumiy hajmga nisbatan foiz hisobida
Jami	92536,0	100
Davlat mulki	13787,9	14,9
Nodavlat mulki	77747,1	83,2

2016-yilda 2015-yilga nisbatan sogʻliqni saqlash xizmatlari 22,2 foizga, yashash va ovqatlanish xizmatlari 21,1 foizga,savdo xizmatlari 20,5 foizga, moliyaviy xizmatlar 19,8 foizga, ijara xizmatlari 17,6 foizga, ko'chmas mulk bilan bog'liq xizmatlar 17,5 foizga, kompyuter va maishiy tovarlarni ta'mirlash boʻyicha xizmatlar 15,6 foizga, me'morchilik, muhandislik izlanishlari, texnik sinovlar va tahlil sohasidagi xizmatlar 15,3 foizga o'sdi.
Xizmatlar tarkibida 2016-yilda savdo va umumiy ovqatlanish xizmatlari 29,6 foizni, transport xizmatlari (logistika xizmatlari bilan birga) 28,2 foizni, moliyaviy xizmatlar 10,4 foizni, aloqa va axborotlashtirish xizmatlari 6,8 foizni tashkil etdi. Yuqori texnologiyali xizmatlarning rivojlanishi an'anaviy xizmatlarga nisbatan tezroq bo'lishiga erishish uchun chora- tadbirlar ko'rilmoqda.