Muhabbat uchun Turfa lazzatlardan ko'rardim ta'tib, Hech biri qilmasdi menga kifoyat. Qalbim diyorida seni uchratib, Yashamoqdan mazmun topdim nihoyat. Iymon kalimasin kuyladim jo'shib, Shu kungacha ishqing sezmabman, nechun?

Muhabbat uchun

Turfa lazzatlardan ko'rardim ta'tib,

Hech biri qilmasdi menga kifoyat.
Qalbim diyorida seni uchratib,
Yashamoqdan mazmun topdim nihoyat.

Iymon kalimasin kuyladim jo'shib,

Shu kungacha ishqing sezmabman, nechun?
Endi hamdlar aytay nomingga qo'shib,
Jon bermoqqa arzir muhabbat uchun.

Jasur To'rayev.
15.06.2021-yil
03:18

OTA

Olam gandiraklab shoshib qolarkan,

Basavlat bir qoya qulasa birdan.
Daryolar sel bo'lib toshib qolarkan,
Boshiga musibat yo'lasa birdan.

Ko'rganga yaralar bitib ketguday,

Dardni chekmaganga osonday malham
Bir g'am bor his qilsa chiqib ketguday
Hattoki ona yer o'z o'qidan ham

Bu g'amki men sira aytolmay yurgan,

Tog'lar ham titragay aytsam nolamdan.
Dahshat-ku, yigitning suyanib turgan,
Qoyadek otasi o'tsa olamdan.

Jasur To'rayev
19.02.2021
(08:28)

Yaqin begonam

Chehrangda jiddiylik, yo'lga boqib tik,

So'zlaringni ichga yutib ketasan.
Meni ham ko'rmagan, ham bilmagandek,
Yonimdan jimgina o'tib ketasan.

Yuragim dod solib isming aytsa ham,

Uzoq tikilsam ham meni sezmaysan.
Ko'zim ko'zlaringni turtib qaytsa ham,
Har gal indamaysan, bundan bezmaysan.

O'tmishda sevgiga eding asira,

Erkalik qilarding faqat o'zimga.
Hozir tor so'qmoqda rahming yo'q sira,
Armondan qoraygan g'amgin yuzimga.

Ko'ngling ko'nglim bilan doim edi teng,

Hatto urushganda qilmas edik qasd.
Men zarda qilganda sen ko'tararding,
Sening jahling chiqsa, men kelardim past.

Oh mening hammadan yaqin begonam,

Hamon seni deya titraydi tanim.
Lekin uchrashganda qiladi alam,
Bir og'iz salomga arzimaganim.
Jasur To'rayev
14.03.2021 (09:40)
Sadoqat

Unga dunyolarni taklif etdilar,

U: menga dunyolar kerakmas, dedi.
Sha'niga millionlab she'rlar bitdilar,
Biroq, u bariga beparvo edi.

Yaqin dugonasi so'rdi sababin,

Shaydolari boqdi qilolmay toqat.
U achchiq yoshlandi, tishladi labin,
Bir so'z dedi: mening ismim - Sadoqat!