Muhabbat uchun Turfa lazzatlardan ko'rardim ta'tib, Hech biri qilmasdi menga kifoyat. Qalbim diyorida seni uchratib, Yashamoqdan mazmun topdim nihoyat. Iymon kalimasin kuyladim jo'shib, Shu kungacha ishqing sezmabman, nechun?

Jasur To'rayev
23.05.2021
01:02

Ona

Hech qachon onaga aytmang dardingiz,

Oqqa aylanmasin soch tolalari.
Qalbida qoldirar o'chmas dog'li iz
Sizni deb chekkuvchi oh- nolalari.

Onaga dard aytmang, dard bergan Xudo,

U shifo berguncha yara bitmaydi.
Hamma dardlar bir kun ketadi, ammo
Onaning qalbdagi dog'i ketmaydi.

Turfa sinovlarga berib go'yo tan,

Boshingizdan baxtni aritib qo'ymang.
Sal hushyorroq bo'ling, dard, sitam bilan,
Onangizni erta qaritib qo'ymang.

Jasur To'rayev
03.04.2021 yil
Yolg'izman

Allohim, yolg'izman buni bildirma,

Sen bergan har ne'mat qimmatli bo'lar.
O'zingdan o'zgaga muhtoj qildirma,
Bandalaring bersa minnatli bo'lar.

Ro'barolar qilma yo'q bo'lsa tobim,

Mehribon ko'ringan illatchilarga.
G'oyibingdan yetkaz risqimni, Robbim,
Kunimni qoldirma minnatchilarga.

Jasur To'rayev.
O3.05.2021-yil

MARDNOMA

Bekam-u ko’stda ham zarra gard bo’lar,

Xalq g’amin kuylagan qalbda dard bo’lar.
Onaga tosh otma, ona yurtga ham,
Er yigit vatanni sevib mard bo’lar.

Orzuyim elimning orzusi degan,

Qayg’uyim yurtdoshim qayg’usi degan.
Tuyg’uyim muhabbat tuyg’usi degan,
Er yigit vatanni sevib mard bo’lar.

Tarix sahifasin qilsam hikoya,

Mardi bor yurtga yov solmagan soya.
Asrlar isbotin topgan bu g'oya,
Er yigit vatanni sevib mard bo’lar.

Har qarich tuprog'in ko’ziga surtgan,

Farzandlik burchini yelkaga ortgan.
Millat aravasin oldinga tortgan,
Er yigit vatanni sevib mard bo’lar.

Ilm-u ma'rifatga to'lar zamoni,

Tinchlik qilichida asrar dunyoni.
Gar qalbida butun bo'lsa imoni,
Er yigit vatanni sevib mard bo’lar.

Jasur To’rayev (10.01.2017-yil)
Noxolis odam

Shunday kimsalar bor - noxolis odam,

Illat bor nuqtadan uzmagay ko'zin.
Beayb Parvardigor - hamma bilsa ham,
U dono sanaydi hammadan o'zin.

Uni hech bir san'at sehrlay olmas,

Oyning dog'ini ham itdek qopadi.
Birovning mehnatin qadrlay olmas,
Hatto Navoiydan xato topadi.