Muhabbat uchun Turfa lazzatlardan ko'rardim ta'tib, Hech biri qilmasdi menga kifoyat. Qalbim diyorida seni uchratib, Yashamoqdan mazmun topdim nihoyat. Iymon kalimasin kuyladim jo'shib, Shu kungacha ishqing sezmabman, nechun?

Jasur To'rayev
05.03.2021-yil
Shoir

She'riga kerakli so'zni qidirib,

Shoir kitoblarga ko'milib ketdi.
Peshonadan oqqan terni sidirib,
Ilm daryosida cho'milib ketdi.

Topolmay samoga tikdi ko'zini,

Cheksiz koinotga diqqat qaratdi.
Kun-u tun axtargan noyob so'zini
Bir lahzada uning o'zi yaratdi.

Jasur To'rayev
18.06.2021-yil
O6:54

ZARDA

Labing burishmasin meni ko'rganda,

Xo'mrayib, dilimni qilmagin xira.
Bil-ki, men ham ko'cha-ko'yda yurganda,
Senga ko'zim uchib turmaydi sira.

Nima topdim sendek ofatni sevib,

Hammaning oldida beobró qilsang.
Sensiz hayot menga qorong'u-ku deb,
Ortingdan yurishlar endi yo'q, bilsang.

Hech narsa sezilmas, yonimdan o'tsang,

Lom-mim, demagayman bo'lsa-da imkon.
Qo'l bermayman, hatto qo'lingni tutsang,
Endi yo'q avvalgi titroq, hayajon.

Yodimda qolgani soxta sevgimiz -

Daraxtdan uzilgan yaproq dek rishta.
Men bildim sen ham bir oddiygina qiz,
Endi ko'rinmaysan bo'lib farishta.

Senga tikilmayman, siltaganman qo'l,

Parvo qilmay diling g'ashlab qo'yaman.
Men seni sevmayman, unutdim butkul,
Shunchaki, ko'z qirim tashlab qo'yaman.

Jasur TO'RAYEV (24.06.2021-yil, 17:12)
Saodat yo'li

Yigit hayotning har go'shasin kezib,

Haq ko'rsatgan yo'ldan yurmoq istadi.
Bu dunyoning yolg'on vaslidan bezib,
Haqiqiy hayotni qurmoq istadi.

Eng avval, nafsiga kishan soldi u,

Iymon sharbatidan qondirdi chanqoq.
Taqvo qurolini qo'lga oldi u,
Qo'rquvdan qolmadi qalbida titroq.

U yo'ldan chiqmasdi, borardi sobit,

Aravasin halol kasb ila tortib.
Hamma kulsa hamki sinmasdi yigit,
Sabr degan yukni yelkaga ortib.

Yillar mobaynida mehnat qildi u,

Hatto xayoliga qo'shmadi g'irrom.
Bir buyuk manzilga yetib keldi u,
Uni kutib oldi Saodat, Ikrom,