Muhabbat uchun Turfa lazzatlardan ko'rardim ta'tib, Hech biri qilmasdi menga kifoyat. Qalbim diyorida seni uchratib, Yashamoqdan mazmun topdim nihoyat. Iymon kalimasin kuyladim jo'shib, Shu kungacha ishqing sezmabman, nechun?

Jasur To'rayev
04.08.2021-yil
(18:12)
SEZMAY QOLIBMAN

O'z dardimga o'ralib, dunyo kezmay qolibman,

Ko'nikdimmi, chamasi, g'amdan bezmay qolibman.
Jangda ko'p qon yo'qotgan askardek mudroq bosib,
Kecha bahor kelganin hatto sezmay qolibman.

Boqsam tungi osmonda kerilibdi yulduzlar,

To'lin oyning husniga berilibdi yulduzlar,
O'sha oqshomdagidek terilibdi yulduzlar,
Ancha bo'ldi ismingiz ko'kka tizmay qolibman.

Men kuylagan qo'shiqni bulbullar solar yodga,

Qalbim ham muzlab qolib qo'l urmabman ijodga,
Qalamimdan uyalib, qoldim yomon isnodga,
She'r ishqida kechalar dilni ezmay qolibman.

Muqovasi yertilib, xordir ko'ngil daftarim,

Yarmi eskirgan, yarmi qordir ko'ngil daftarim,
A'lochi o'quvchiga zordir ko'ngil daftarim,
Oq varoqqa sizni men har dam chizmay qolibman.

Mag'lublar sozidagi sado bo'ldim, shekilli,

Yutqazilgan ishq uchun fido bo'ldim, shekilli,
Siz ketgach hislarimdan judo bo'ldim, shekilli,
Kecha bahor kelganin hatto sezmay qolibman.

Jasur TO'RAYEV (2021-yil. Yoz faslida.)

Ota-ona
Tumanni tarqatib, chiqqanday quyosh,
So'zlar dil yoritgan bayot bo'lganda.
Inson har qayg'uga beradi bardosh
Ota-yu onasi hayot bo'lganda.
Bag'ridan topilar xalovat va tin,
Goh ularga shirin so'z deyolmaymiz.
O'lchasak mehrining har bir tomchisin,
Tinch-u Atlant, Hindga sig'dirolmaymiz.
Gohida farzandlar qilganda xato,
Tanbeh bersalarda, qahri bo'lmaydi.
Hatto qo'llasalar eng og'ir jazo,
Arining zahricha zahri bo'lmaydi.
Harsanglar ostida qolib ketganday,
Ko'ngil yarasiga surtolmas malham.
G'am-anduh ruhini taslim etganday,
Ota-onasini yo'qotgan odam.
Demang, yozgan she'ring oddiy va zaif,
Kim tashbih topibdi suyukligiga?!
Eng buyuk so'zlar ham bo'lolmas ta'rif,
Ota-yu onaning buyukligiga.