Bitiruv malakaviy ish Mavzu: Erkin Vohidov lirikasi: badiiy mahorat va uslubiy individuallik

Bitiruv malakaviy ish

Mavzu: Erkin Vohidov lirikasi: badiiy mahorat va uslubiy individuallik

Bajardi: Sobirova Hilola
Ilmiy rahbar: dots. S.Qurbonova

MUNDARIJA:

Kirish.

I BОB. ERKIN VOHIDOV LIRIKASINING MAVZU DOIRASI

1.1. Erkin Vohidov she’riyatida insonparvarlik g‘oyalari va poetik talqin.

1.2. Shoir ijodida Vatan, muhabbat, do‘stlik va vaqt mavzusi.

II BOB. ERKIN VOHIDOV SHE’RIYATIDA SHAKLIY VA USLUBIY IZLANISHLAR

2.1. Shoir lirikasida hajviy talqin.

2.2. Erkin Vohidov she’riyatida metafora va metaforiklik.

Xulosa.

Foydalanilgan adabiyotlar ro‘yxati

КIRISH

КIRISH

 

Mavzuning dоlzarbligi. Mustaqilligimiz tobora mustahkamlanib, o‘zining ijobiy samaralarini bera boshlagan bugungi kunda xalqimiz oldida hayotning moddiy va ma’naviy asoslaridan kelib chiqadigan ulkan vazifalar turibdiki, ularni amalga oshirishda adabiyot va san’at, umuman, ma’naviyatning ahamiyati benihoya kattadir. Zero, O‘zbekistonning Birinchi Prezidenti I.A.Karimov ta’kidlaganidek, “…ma’naviyatni tushunish, anglash uchun avvalo, insonni tushunish, anglash kerak”.

Mustaqillik yillarida adabiyotni mafkura vositasi sifatidagina emas, balki san’at hodisasi sifatida o‘rganishga ustuvor ahamiyat berila boshlandi. Shu ma’noda alohida ijodkorning badiiy tafakkur tarsi, ijodiy uslubiga xos xususiyatlarni o‘rganish muhim ahamiyatga egadir. Haqiqatan ham, “…yozuvchilik – bu oddiy kasb emas, peshonaga yozilgan taqdir. Uning maktabi ham, dorilfununi ham bitta. U ham bo‘lsa, bir umr hayotning ichida bo‘lish, o‘z xalqi bilan hamdardu hamnafas bo‘lib yashash, haqiqat va adolatga sadoqat bilan xizmat qilishdir”. Chunki bu yo‘nalishda amalga oshiriladigan tadqiqotlar yangi davr o‘zbek adabiyotining poetik takomiliga, ijtimoiy-siyosiy, ma’naviy-axloqiy muammolarini hal qilishga zamin hozirlaydi.

Mavzuning o‘rganilganlik darajasi. O‘zbekiston xalq shoiri Erkin Vohidovning ijodiga bag‘ishlangan ko‘pgina ilmiy tadqiqotlar mavjud. Bu borada adabiyotshunos olimlar O. Sharafiddinov, H. Boltaboyev, M. Qo‘shjonov, U.Normatov, E. Usmonovlarning tadqiqotlari ahamiyatga molik.